qwirkle
Qwirkle jokoa Susan McKinley-k diseinatu zuen 2006an eta MindWare-k argitaratu zuen.
Qwirkle cubes jokoa ere Susan McKinley-k diseinatu zuen, 2009an. MindWarek argitaratu zuen.
![]() |
| Qwirkle jokoaren fitxak. |
Qwirkle
Osagaiak eta hasiera
Jokoak 108 fitxa ditu, sei koloretan eta sei irudirekin; fitxa bakoitza hiru aldiz errepikaturik dago. Hauek dira koloreak: berdea, gorria, horia, laranja, morea eta urdina. Hauek dira irudiak: erronboa, hirusta, karratua, lauko izarra, zirkulua eta zortziko izarra.
Joko honetan bi, hiru eta lau jokalarik har dezakete parte. Bost jokalarirekin ere joka daiteke.
Helburua fitxak konbinatuz ahalik eta puntu gehiena lortzea da. Hori lortzen duen jokalaria izango da irabazlea.
Arauak
Jokalari bakoitzak sei fitxa hartuko ditu zoriz poltsatik, eta besteei erakutsi gabe.
Fitxak bi eratan konbina daitezke: kolore bereko baina irudi desberdineko fitxak ilara batean jarriz edo irudi bereko baina kolore desberdineko fitxak ilara batean jarriz. Beraz, lerro bateko konbinazio batek gehienez sei fitxa izango ditu.
Partida hasteko, jokalari bakoitzak esan behar du zenbat fitxa konbina ditzakeen hartu dituen sei fitxetatik. Fitxa gehien konbina ditzakeenak hasiko du partida, fitxa horiek mahai gainean jarriz. Berdinketa egonez gero, jokalari zaharrena hasiko da. Ondoren, erlojuaren kontrako noranzkoan jokatuko da.

Irudian, lehenengo jokalariak hiru fitxa hori jarri ditu eta 3 puntu eskuratzen ditu.
Txanda batean jokalariak hiru aukera ditu:
- Fitxa bat mahaian jartzea, dauden fitxekin konbinatuz, eta poltsatik bat hartzea, berriro sei izateko.
- Fitxa bat baino gehiago mahaian jartzea, dauden fitxekin konbinatuz, eta poltsatik adina fitxa hartzea, berriro sei izateko. Mahaian jartzen dituen fitxak lerro bakar batean jarri behar ditu, baina ez ditu zertan bata bestearen ondoan jarri.
Irudian, bigarren jokalariak lau erpineko hiru izar jarri ditu; hiru izarrek 3 puntu ematen diote eta, fitxa horien lerroa luzatu duenez, 4 puntu hartuko ditu; guztira, 7 puntu irabazi ditu.
- Bere fitxa batzuk edo guztiak poltsako beste batzuez ordeztea.
Mahaian jartzen diren fitxak daudenekin konbinatu behar dira derrigorrez.
Irudian, hirugarren jokalariak bi fitxa more jarri ditu, horien parean. Bi fitxa morek 2 puntu ematen dizkiote; bestalde, bi izarreko lerroak beste 2 puntu eta bi karratuko lerroak beste bi puntu ematen dizkiote; guztira, 6 puntu irabazi ditu.
Lerro batean eransten diren fitxek lerroko fitxek duten ezaugarri bera izan behar dute, kolorea edo irudia.
Lerro bateko konbinazioak ezin ditu bi fitxa berdin izan.
Irudian, laugarren jokalariak bi fitxa more jartzen ditu lerro berean, baina ez bata bestearen ondoan. Lerro morea luzatu duenez, 4 puntu hartzen ditu eta, bi zirkuluko lerroa osatu duenez, beste bi puntu hartzen ditu; guztira, 6 puntu irabazi ditu.
Puntuazioa:
1. Fitxak lerro batean jartzen direnean, lerro horretan geratzen diren fitxa adina puntu lortuko dira.
2. Horrez gain, jarritako fitxek norabide perpendikularrean dauden beste lerro batzuk luzatzen badituzte, lerro horiei dagozkien puntuak lortuko dira.
3. Horrez gain, jarritako fitxek sei fitxako konbinazio bat osatzen badute, sei puntu estra lortuko dira, horrelako bakoitzeko.
4. Partida bukatzen duen jokalariak sei puntu estra jasoko ditu.
Hurrengo irudietan lau jokalariek egin dituzten jokaldiak ikus daitezke. Hona hemen lortu dituzten puntuak:
![]() |
![]() |
![]() |
![]() |
Lehenengo jokalariak, bere bigarren txandan, bi karratu erantsi ditu eta 4 puntu irabazi ditu. Ondoren, bigarren jokalariak bi erronbo kokatu ditu; bi erronboek 2 puntu ematen dizkiote eta, erronbo gorriak lerro gorri bat osatu duenez, beste 3 puntu eskuratzen ditu; guztira, 5 puntu irabazi ditu. Hirugarren jokalariak hiru hirusta erantsi ditu; hirusten lerroak 4 puntu ematen dizkio eta, hirusta horiak lerro horia luzatu duenez, beste 5 puntu eskuratzen ditu; guztira 9 puntu irabazi ditu. Laugarren jokalariak hiru erronbo eransten ditu; erronboek 3 puntu ematzen dizkiote; bestalde, osatu duen lerro berdeak beste 2 puntu ematen dizkio; eta, azkenik, erronbo horiarekin sei irudiko lerro horia bukatu duenez, 6 puntu gehi 6 puntu estra, hots, 12 puntu lortzen ditu; guztira, beraz, 17 puntu irabazi ditu.
Partida bukatuko da poltsako fitxak bukatu ondoren, jokalari batek bere fitxa guztiak mahaian jartzen dituenean.
Qwirkle cubes
![]() |
| Qwirkle cubes jokoaren kuboak. |
Osagaiak eta hasiera
Jokoak 90 kubo ditu, sei koloretan eta sei irudirekin; kubo bakoitza kolore batekoa da eta sei irudiak ditu. Kolore bakoitzeko 15 kubo daude.
Joko honetan bi, hiru eta lau jokalarik har dezakete parte.
Helburua kuboak konbinatuz ahalik eta puntu gehien lortzea da. Hori lortzen duen jokalaria izango da irabazlea.
Arauak
Kubo guztiak poltsan sartzen dira.
Jokalari bakoitzak sei kubo hartuko ditu zoriz poltsatik, eta mahai gainean jaurtiko ditu, bere eskua osatzeko. Kuboen goiko aurpegia erabiliko da konbinazioak egiteko.
Jokalari guztiek beren kuboak erakusten dituzte partida osoan. Hots, jokalari guztiek badakite, une oro, zer kubo dituzten beste jokalariek.
Jokalari zaharrena hasiko da jokatzen.
Hasten den jokalariaren lehen txandan, jokalaria kubo gehien erabiltzen duen konbinazioarekin hasiko da. Ezin badu kubo bat baino gehiago konbinatu, jokalari guztiek berriro jaurtiko dituzte kuboak, gutxienez bi kuborekin hasteko moduan izan arte.
Jokalari bakoitzaren txandan,
- Berriro jaurti nahi dituen kuboak, jaurti nahi badu, aukeratu eta jaurti.
- Mahaiko konbinazioetan kuboak erantsi. Jokatzen diren kubo guztiek ezaugarri bera, kolorea edo irudia, izan behar dute. Kuboak lerro berean erantsi behar dira, baina ezin dira elkarren ondoan egon.
- Lortutako puntuazioa idatzi.
- Poltsatik kuboak hartu eskuan sei izan arte. Kubo berriak jaurti eta eskuan dituenei erantsi.
Jokalari batek ezin badu jokatu, eskuko kuboak jaurtiko ditu jokatu ahal izan arte.
Kuboen jaurtiketa
Bi kasutan baino ezin dira kuboak jaurti. Norberaren txandaren hasieran eskuan dituen kuboak, nahi dituenak, jaurti daitezke. Edo poltsatik hartzen diren kubo berriak jaurti daitezke, eskura eraman baino lehen.
Kuboak mahaiko konbinazioetan ortogonalki eransten dira, bertikalean edo horizontalean, baina ez diagonalean.
Bi kubok edo gehiagok lerro bat osatzen dute. Lerro batek, gehienez, sei kubo izan ditzake, irudi batekin edo kolore batekin. Lerroari eransten zaizkion kuboek lerroko kuboek duten ezaugarri komuna izan behar dute.
Irudien lerro batek kolore bakoitzeko kubo bakarra izan dezake. Koloreen lerro batek irudi bakoitzeko kubo bakarra izan dezake. Hau da, ezin dira kolore eta irudi bereko bi kubo egon lerro batean.
Gerta daiteke hutsune batzuetan kuborik ez sartzea, kuboek ondoko kuboek dituzten ezaugarri bera izan behar dutelako.
Puntuazioa:
- Lerro bat osatzen denean, lerro horretako kubo bakoitzeko puntu bat jasotzen da.
- Lerro bati kuboak gehitzen zaizkionean, puntu bat lortzen da lerroan geratzen den kubo bakoitzeko, lehendik zeudenak barne.
- Horrez gain, jarritako kuboek norabide perpendikularrean dauden beste lerro batzuk luzatzen badituzte, lerro horiei dagozkien puntuak lortuko dira.
- Jarritako kuboek sei kuboko konbinazio bat, qwirkle bat, osatzen badute, sei puntu estra lortuko dira, horrelako bakoitzeko. Sei kuboek kolore berekoak izan behar dute, baina irudi desberdinekoak, edo irudi berekoak izan behar dute, baina kolore desberdinekoak.
- Partida bukatzen duen jokalariak sei puntu estra jasoko ditu.
Partidaren bukaera
Poltsan kubo gehiagorik geratzen ez denean, partidak lehen bezala segituko du, baina kubo berririk hartu gabe. Eskuko kubo guztiak jartzen dituen lehen jokalariak bukatuko du partida eta sei puntu estrak lortuko ditu.
Iturriak
Eskuko arauak: www.mindware.com (2021-02-23)





